"இ-வே பில்' பயன்பாட்டில் தளர்வு... சரியான முடிவு! தொழில் துறையினருக்கு நிம்மதி

பத்து கிலோ மீட்டர் சுற்றளவு வரை, "இ-வே பில்' தேவையில்லை என்ற அறிவிப்பு, தொழில் துறையினருக்கு மகிழ்ச்சி அளித்துள்ளது. இதனால், மிகப்பெரிய தலை வலி நீங்கியுள்ளதாக கருத்து தெரிவிக்கப்படுகிறது.
மத்திய நிதி அமைச்சர் அருண்ஜெட்லி தலைமையில், அனைத்து மாநில நிதித்துறை அமைச்சர்களை அங்கத்தினராக கொண்டு, ஜி.எஸ்.டி., கவுன்சில் அமைக்கப்பட்டுள்ளது. இக்கவுன்சில், பொருட்களுக்கான வரி விகிதம், வரி மறு சீரமைப்பு நடவடிக்கைகள் மேற்கொள்கிறது.ஜி.எஸ்.டி., வரி சட்டப்படி, பொருட்களை ஓரிடத்திலிருந்து, இன்னொரு இடத்துக்கு கொண்டுசெல்லும்போது, அந்த பொருளின் முழு விவரங்கள் அடங்கிய "இ-வே பில்'வைத்திருக்கவேண்டியது அவசியம். பொருட்களில் மதிப்பு, 50 ஆயிரம் ரூபாய்க்கு மேல் இருந்தால், இ-வே பில் கட்டாயம் என அறிவிக்கப்பட்டது.
நேற்று முன்தினம் கூடிய ஜி.எஸ்.டி., கவுன்சிலில், "இ-வே பில்' பயன்பாட்டிலும் மாற்றம் கொண்டுவரப்பட்டுள்ளது. பத்து கிலோமீட்டர் சுற்றளவு வரை, கொண்டுசெல்லப்படும் சரக்குகளுக்கு, "இ-வே பில்' தேவையில்லை என அறிவிக்கப்பட்டுள்ளது. இந்த அறிவிப்பு, திருப்பூர் தொழில் துறையினருக்கு மிகவும் உதவிகரமாக அமையும்.நிட்டிங், டையிங், பிளீச்சிங், காம்பாக்டிங், வாஷிங், தையல், எம்ப்ராய்டரி, பிரின்டிங் என, சங்கிலி தொடர் போல் ஏராளமான துறைகளை அங்கமாக கொண்டது, பின்னலாடை தயாரிப்பு துறை. அனைத்துவகை ஜாப் ஒர்க் நிறுவனங்களைக்கடந்தே, ஆடை தயாரிப்பு முழுமை பெறுகிறது.
ஆடை தயாரிப்புக்கு கைகொடுக்கும் ஏராளமான ஜாப் ஒர்க் நிறுவனங்கள், திருப்பூர் மாநகர பகுதியில், பத்து கிலோமீட்டர் தூரத்துக்கு உள்ளாகவே இயங்குகின்றன. எனவே, ஒரு நிறுவனத்திலிருந்து இன்னொரு நிறுவனத்துக்கு சரக்கு கொண்டுசெல்லும்போது, ஜாப் ஒர்க் துறையினர் "இ-வே பில்' பயன்படுத்தவேண்டிய அவசியம் இல்லை.
ஏற்றுமதியாளர் சங்க பொது செயலாளர் விஜயகுமார் கூறியதாவது: திருப்பூரில், ஆடை தயாரிப்பு சார்ந்த பெரும்பான்மை ஜாப் ஒர்க் நிறுவனங்கள், பத்து கிலோ மீட்டர் சுற்றளவுக்கு உள்ளாகவே இயங்குகின்றன. ஜி.எஸ்.டி., கவுன்சிலின் புதிய அறிவிப்பு படி, ஜாப் ஒர்க் நிறுவனங்கள், "இ-வே பில்' பயன்பாட்டிலிருந்து விலக்கு பெறுகின்றன. இதனால், ஆவண தயாரிப்பு, பொருட்களை கொண்டுசெல்வதில் ஏற்படும் காலதாமதம் தவிர்க்கப்படும். சிறு, குறு நிறுவனங்கள், ஜாப் ஒர்க் துறையினருக்கு இந்த அறிவிப்பு மிகவும் உதவியாக அமையும், என்றார்.



http://www.dinamalar.com/news_detail.asp?id=1828563

நாடு முழுவதும் ஒரே நாளில் ஜூன் 1-ம் தேதியிலிருந்து இ-வே பில் அமலாக்கம்: தொழில்துறையினர் கோரிக்கை

மாநிலங்களுக்குள் இடையில் நடைபெறும் சரக்கு பரிமாற்றத்துக்கான இ-வே பில் நடைமுறை ஜூன் 1-ம் தேதியிலிருந்து அமலாக்க வேண்டும் என தொழில்துறையினர் கூறியுள்ளனர்.

ஜிஎஸ்டி சட்டம் அமலாக்கப்பட்ட பின்னர் மாநிலங்கள் இடையே நடைபெறும் சரக்கு போக்குவரத்துக்கான இ-வே பில் முறையில் குழப்பம் நீடித்து வருகிறது. இந்த நடைமுறையை பிப்ரவரி மாதம் 1-ம் தேதி முதல் அமல்படுத்தப்படும் என ஜிஎஸ்டி கவுன்சில் அறிவித்தது. இதற்கு 15 மாநிலங்கள் ஒப்புதல் தெரிவித்தன. இந்த நிலையில் இ-வே பில் நடைமுறையை நாடு முழுவதும் ஒரே நாளில் அமல்படுத்தும் வகையில் ஜூன் 1-ம் தேதியிலிருந்து அமல்படுத்த வேண்டும் என ஜிஎஸ்டி கவுன்சிலுக்கு தொழில்துறையினர் கோரிக்கை விடுத்துள்ளனர்.

இது தொடர்பாக தொழில் துறையினர் கூறுகையில், இ-வே பில் நடைமுறைப்படுத்துவதில் நாடு முழுவதும் குழப்பம் நீடித்து வருகிறது. 15 மாநிலங்கள் மட்டும் இதை ஏற்றுக் கொண்டு, பிப்ரவரி 1-ம் தேதியிலிருந்து அமல்படுத்த உள்ளதாக அறிவித்தன. இத னால் தொழில்துறையில் மிகப் பெரிய குழப்பம் உருவானது. சில மாநிலங்கள் தங்களுக்கு ஏற்ற வகையில் அமல்படுத்துவதற் கான தேதியை முடிவு செய்தாலும், ஜூன் 1-ம் தேதிக்குள் அனை த்து மாநிலங்களும் அமல்படுத்த வேண்டும் என அறிவிக்கலாம் கோரிக்கை விடுத்திருக்கின்றனர்.

மாநிலங்களுக்குள் நடக்கும் சரக்கு பரிமாற்றத்துக்கு ஒவ் வொரு முறையும் இ-வே பில் கட்டாயம் என்பது தொழில் துறையை முடக்கக்கூடியது. மாநிலங்களுக்குள் நடக்கும் சரக்கு போக்குவரத்துக்கான நடைமுறையை மறுபரிசீலனை செய்ய வேண்டும். ஜிஎஸ்டிஎன் இணையதளத்தில் இ-வே பில் தொடர்பாக ஆவணங்களை பதிவு செய்யும் வசதி உருவாக்கப்படவில்லை என்றும் கூறினர். இது தொடர்பாக பேசிய டெலாய்ட் நிறுவனத்தின் பங்குதாரர் எம்.எஸ்.மணி கூறுகையில், ஜிஎஸ்டி தொடர்பாக அடுத்த நடவடிக்கைகளை மேற்கொள்ளும் முன்பு நாடு முழுவதும் ஒரே நடைமுறை, ஒரே வகையான மென்பொருள், கணக்கு முறைகள் தயாராக இருக்க வேண்டும் என்று கூறினார்.

மாநிலங்களுக்குள் நடக்கும் சரக்கு போக்குவரத்துக்கு இ-வே பில் கட்டாயம் என அறிவிக்கப்பட்டுள்ளது. இதன் காரணமாக மிகப் பெரிய அளவில் பாதிப்பு உருவாகும் என்றும் அவர் குறிப்பிட்டார்

http://tamil.thehindu.com/business/article22606958.ece

கோவை, திருப்பூரில் நாளை முதல் நடைமுறை இ-வே பில் இல்லாவிட்டால் சரக்குகள் பறிமுதல், அபராதம்

: கோவை, திருப்பூர், நீலகிரி மாவட்டத்தில் ஜிஎஸ்டி நடைமுறைக்கு பின் கடந்த 6 மாதமாக 30 சதவீதம் வரி வருவாய் இழப்பு ஏற்பட்டுள்ளது. இதை தொடர்ந்து வருவாயை அதிகரிக்கும் வகையில், நாளை முதல் நடைமுறைக்கு வர உள்ள சரக்குகளுடன் இ-வே பில் உள்ளதா என்பதை கண்காணிக்க 3 மாவட்டத்திலும் 6 துணை கமிஷனர்கள் மற்றும் 45 உதவி கமிஷனர்கள் களம் இறங்குகின்றனர்.  கோவை கோட்ட வணிகவரி இணை கமிஷனர் அலுவலகம் வணிகவரி மற்றும் அமலாக்கம் ஆகிய இணை கமிஷனர்கள் தலைமையில் உள்ளது. கோவையில் 3 வரி விதிப்பு மாவட்டங்கள், திருப்பூர், நீலகிரி, பொள்ளாச்சி ஆகியவற்றில் தலா ஒரு வரி விதிப்பு மாவட்டங்கள் என மொத்தம் 6 வரி விதிப்பு மாவட்டங்கள் 6 துணை கமிஷனர்கள் தலைமையில் உள்ளது. இதில் 45 வரி விதிப்பு வட்டங்கள் 45 உதவி கமிஷனர்கள் தலைமையில் உள்ளது. இதில் 1.10 லட்சம் பதிவு பெற்ற வணிக நிறுவனங்கள் இருந்தன. இவற்றின் மூலம் மாதம்தோறும் சராசரியாக 500 கோடி வணிகவரி வருவாய் கிடைத்து வந்தது.

இதில் வணிகவரி பதிவு பெற்ற நிறுவனங்களில் 98 சதவீத நிறுவனங்கள் ஜிஎஸ்டி பதிவின் கீழ் வந்தன. கடந்த ஜூலை முதல் டிசம்பர் மாதம் வரை கடந்த 6 மாதங்களாக ஜிஎஸ்டி வருவாய் முந்தைய வரி வருவாயோடு ஒப்பிடுகையில் 70 சதவீதம் மட்டுமே வசூலாகியுள்ளது. 30 சதவீதம் இழப்பு ஏற்பட்டுள்ளது.  ஜிஎஸ்டி அமலாக்கத்திற்கு பிறகு வரி வருவாய் குறைந்ததற்கு, கோவை, திருப்பூர் மற்றும் நீலகிரி மாவட்டங்களில் உள்ள கிரானைட், டைல்ஸ், மார்பிள்ஸ், எலக்ட்ரிகல் அண்ட் எலக்ட்ரானிக் உள்ளிட்ட பல்வேறு வணிக நிறுவனங்கள் பில் இல்லாமல் விற்பனை செய்வது தெரியவந்துள்ளது.

 இந்நிலையில், நாளை முதல் இ-வே பில் உடன் ஒரு இடத்தில் இருந்து மற்றொரு இடத்திற்கு சரக்குகள் அனுப்புவது கட்டாயமாகியுள்ளது. வரி வருவாயை அதிகரிக்க இ-வே பில் ரெய்டை தீவிரப்படுத்த கோவை கோட்ட மாநில ஜிஎஸ்டி அலுவலகத்தினர் நாளை முதல் களமிறங்குகின்றனர்.
 இது குறித்து கோவை மண்டல மாநில ஜிஎஸ்டி அலுவலகம் (வணிகவரி) தரப்பில் கூறுகையில், ‘‘நாளை முதல் கோவை, திருப்பூர், நீலகிரி உள்ளடங்கிய கோவை கோட்டத்தில் சரக்கு வாகனங்களில் இ-வே பில் உள்ளதாக என்பதை பரிசோதிக்க 6 துணை கமிஷனர்கள், 45 உதவி கமிஷனர்கள் தலைமையில் நூற்றுக்கணக்கான ஊழியர்கள் களமிறங்குகின்றனர். இ-வே பில் இல்லாத சரக்குகளை பறிமுதல் செய்து அபராதம் விதிக்கப்படும் என்றனர்.



http://www.dinakaran.com/News_detail.asp?Nid=371636

ஜி.எஸ்.டி – எனது பார்வையில் – பாகம் 6

இன்றைய தேதிக்கு ஜி.எஸ்.டி 90% முழுமை ஆயிருச்சு. இப்போ நிலமை எப்படி இருக்குனு பார்க்கலாமா?

கடந்த மே மாதம் 18,19 தேதிகளில் நடந்த ஜி.எஸ்.டி கவுன்சில் கூட்டத்தில் எடுக்கப்பட தீர்மானமும் சேர்த்து இதுவரை 7 விதமான ரூல்ஸ் அப்ரூவ் ஆகிருக்கு. இன்னும் 2 ரூல்ஸ் பாக்கி. இப்போதிருக்கும் வரியிலிருந்து ஜி.எஸ்.டி வரிக்கு மாறும்போது செய்யவேண்டியது என்னென்ன என்கிறTransitional Provisions Rules மற்றும் மாதாந்திர வரி செலுத்தும் முறைகளுக்கான விதிகள் Returns Rules இரண்டும் வரும் ஜூன் 3 ஆம் தேதி இறுதி செய்யப்படும்.

ஆனா, என்னை பொருத்தவரைக்கும் இந்த இரண்டு ரூல்ஸ் தான் மிக முக்கியமானது. முதலிலேயே இறுதி செஞ்சிருக்கணும். இது ஏன் முக்கியம்?

Transitional Rule - ஜி.எஸ்.டி முறைக்கு மாறுவதற்கு முன்பு செய்யவேண்டிய பணிகள், மாறியபின் கிடைக்கக்கூடிய அனுகூலங்கள் ஆகியவற்றை தீர்மானிக்கிறது. இதன் அடிப்படையில் தான் நாம் நமது கொள்முதல் திட்டங்களை (Purchase Strategy) தீர்மானிக்கவே முடியும். ஏற்கனவே கையிருப்பில் இருக்கும் சரக்குகளுக்கு (Stock in Hand) நாம் செலுத்திய வரியை சிந்தாமல் சிதறாமல் ஜி.எஸ்.டிக்கு எடுத்து செல்லவும் இந்த விதிகள் தான் உதவும். ஆனால் இதை இன்னமும் இறுதி செய்யாததால் பல பல முடிவுகள் எடுக்கமுடியாமல் இருக்கிறது. அதாவது ஜூன் 30 ஆம் தேதி கையிலுள்ள ஸ்டாக் எடுக்கணுமா வேண்டாமா, அப்படி எடுக்கணும்னால், ஜூன் 25 ஆம் தேதியில் இருந்து எந்த பொருட்களும் நாம் வாங்காமல் இருக்கணும். அப்படி வாங்காமல் இருந்தால் நமது உற்பத்தி பாதிக்கும், அதை தவிர்க்க ஜூன் 25 முதல் ஜூலை 5 வரையான உற்பத்திக்கு தேவையான பொருட்களை ஜூன் 25க்கு முன்பே வாங்கி வெக்கணும். அதுக்கு இப்பவே ஆர்டர் கொடுக்கணும். இதெல்லாம் செய்யலாமா வேண்டாமா.. எதுவும் தெரியாமல் எல்லோரும் திரிசங்கு நிலையில் இருக்காங்க.

அதே மாதிரி, Closing Stock விவரங்களை கொடுக்கும்போது அது தொடர்பானPurchase Bills விவரங்களையும் கொடுக்கணும்னு சொல்லி இருக்காங்க. ஒரு வருடத்துக்கு முன்பு வாங்கிய பொருட்களில் இப்போது எவ்வளவு கையிருப்பில் இருக்கு என கணக்கெடுப்பதும், அது எந்த பில் மூலம் வாங்கப்பட்டதுன்னு கணிக்கிறதும், அந்த பில் விவரங்களை தேடி எடுத்து அரசுக்கு தாக்கல் செய்வதும் இமாலய வேலை. அதுவும் ஜூன் 30 அன்னைக்கு ஸ்டாக் எடுத்து முடிச்சப்பறம் அது தொடர்பான பில்லை தேடி எடுத்து அதை தாக்கல் செய்தால் தான் அதிலுள்ள Input Tax Credit நமக்கு கிடைக்கும். இல்லைன்னா அந்த தொகை ஹொகையா தான்.

ஜூன் 25 முதல் ஜூன் 30 வரையிலான காலகட்டத்தில் வழியில் வந்துகொண்டிருக்கும் சரக்குகளின் விவரங்களையும் நாம் தாக்கல் செய்தாக வேண்டும். அது மற்றுமொரு குழப்பமான பணி. நாம் எதிர்பார்க்கும் நாளில் அந்த வண்டி நம்மை வந்து சேருமா என்பதை கணிக்கவே முடியாதே.

இதெல்லாம் ஒருபுறம்.

வரி விகிதங்களை இப்போதைக்கு முடிவு செய்து விட்டார்கள். இதில் ஆச்சர்ய அதிர்ச்சியாக சேவைகளுக்கான வரி விகிதம் (Service Tax Rate) ஒற்றை வரி விகிதமாக அல்லாமல் (Single Slab) 0%, 5%, 12%, 18%, 28% என வெவ்வேறு வரி விகிதமாக (Multiple Slab) இருப்பது.   

அதிலும் ஒரே சேவைக்கு வெவ்வேறு வரிவிகிதங்களும் உள்ளது. இன்னொரு புறம் ஒவ்வொரு சேவைக்கும் ஒரே அக்கவுண்டிங் கோட் தான் தரப்பட்டு இருக்கிறது. ஆனால் அதே அக்கவுண்டிங் கோடில் வெவ்வேறு வரி விகிதம். உதாரணமாக லாட்ஜ் & அக்காமடெஷன் வழங்கும் ஒரு ஹோட்டல் சேவைகளுக்கு ஒரே அக்கவுண்ட் கோடு தான். ஆனால் அவற்றின் விலை அடிப்படையில் வரி விகிதங்கள். அதாவது 1000 ரூ வரை வாடகை எனில் 0%;2500 வரை வாடகை எனில் 12%; 5000 வரை வாடகை எனில் 18%; 5000 க்கு மேல் வாடகை எனில் 28%. முன்பு ஹோட்டல் சேவைக்கு ஒரே அக்கவுண்ட் ஒரே வரிவிகிதம் (14%). எத்தனை வாடகை என்றாலும் அந்த வாடகைக்கு 14% வரி என எளிமையாக இருந்தது.

ஒரே ஹோட்டலில் வெவ்வேறு வகையான ரூம்கள் இருக்கும். நான் ஏசி, ஏசி,ஏசி டீலக்ஸ், ஃபாமிலி ரூம் என பல வகையான ரூம்களும் அதற்கு தக்கபடி விதம் விதமான வாடகையும் இருக்கும். இவர்கள் இனி தனி தனியாக கணக்கு வைத்து அதற்கு தக்கபடி வரி கட்டவேண்டி இருக்கும்.

இதே நிலை தான் பல பல சேவைகளுக்கும் பல சரக்குகளுக்கும். ஒரே பொருளுக்கு அதன் HSN Code அடிப்படையில் வெவ்வேறு வரி.

இந்த குழப்பங்கள் அதன் தாக்கங்கள் எல்லாவற்றையும் புரிந்து கொண்டு இனி எப்படி பட்ட வியாபார உக்திகளை கையாள்வது என முடிவெடுப்பதற்கு முன்பாகவே ஜூலை 1 ஆம் தேதி ஜி.எஸ்.டி வந்துவிடும்.

ஜூன் 3 ஆம் தேதி இறுதி செய்யப்படும் விதிகளின் அடிப்படையில் தான் ஜி.எஸ்.டி வரும் என கொண்டால் ஜூலை 1 ஆம் தேதிக்கு வெறும் 27 தினங்களே இருக்கின்றன. இதில் 20+ மாநிலங்கள் இன்னமும் தங்கள் மாநில சட்டங்களை இயற்றவில்லை, தமிழகம் உட்பட. அவர்களெல்லாம் சட்டங்களை இயற்றி அமலாக்க 10 நாட்கள் என கொண்டால், மிச்சமிருப்பது 17 நாட்கள். இதற்குள்ளாக நாம் நமது ERP மென்பொருளை மாற்றி, நம் தொழில் நிறுவனங்களில் உள்ளவர்களுக்கு பயிற்சி அளித்து அவர்களை ஜி.எஸ்.டிக்கு தயார் படுத்தி, வெளிமாநிலங்களில் இருந்து பெறப்படும் பொருட்களுக்கான வரி சலுகையை கணக்கிட்டு அதன் அடிப்படையில் நமது பொருள் கொள்முதலை இறுதிசெய்து, அதன் அடிப்படையில் பணியை தொடர்வது என்பது பெரும் வேலை. அதுவரை எல்லாம் ஒரு தேக்க நிலையில் தான் செல்லும். இப்போதே பல வியாபாரங்கள் கொள்முதலோ விற்பனையோ இல்லாமல் டல்லடித்து கிடக்கின்றன. என்ன நடக்கபோகிறது என்பதே தெரியாமல் குழப்பத்தில் தான் எல்லோருமே இருக்கின்றனர். 

இப்போதிருக்கும் வரி சட்ட அடிப்படையிலான Assessment, Appeal, Refundஆகியவை அதே சட்டப்படி தொடரும் என அறிவித்திருப்பது மற்றுமொரு குழப்பம். இப்படியான விஷயங்கள் இன்னமும் நிலுவையில் உள்ள நிறுவனங்கள் Technically இரு வித வரிவிதிப்பு முறைகளிலும் Parallel பயணம் செய்யவேண்டி இருக்கும்.

சேவை வரி விதிகளில் தொழில் நிறுவனங்களுக்கு மற்றுமொரு பாதிப்பாக சரக்கு போக்குவரத்துக்கான வரிக்கு (GTA) ITC வசதி இல்லை என அறிவித்து இருப்பது. இப்போது நாம் கொள்முதல் செய்யும் பொருட்களுக்கான போக்குவரத்து செலவுக்களுக்கு (Freight Charges) வரி செலுத்தி அதை ITC ஆக எடுத்து கொள்ளலாம்.  இனி அது முடியாது. இது மிகப்பெரிய இழப்பாக நிறுவனங்களுக்கு வரும்.

அதே போல காண்டிராக்டர் முறையில் வேலைக்கு ஆட்களை வைத்து செய்வோர்களுக்கு (Manpower / Labour Supply) இதுவரை நிறுவனங்கள் RCMமுறையில் வரி செலுத்தி வந்திருக்கின்றன. இனி அதற்கு RCM இல்லை. அதனால் பதிவு பெற்ற பெரும் காண்டிராக்டர் தவிர சிறு காண்டீராக்டர்களுக்கு அதிகமாக வேலை வாய்ப்பு கிடைக்காது. இது மற்றுமொரு பெரும் வேலை வாய்ப்பிழக்கு வழி கோலும்.

ஈ வே பில் (E-Way Bill) என ஒன்றை அறிவித்தது அரசு. அதாவது, இப்போது ஒவ்வொரு மாநிலமும் தங்களுக்கென்று தனித்தனியாக ரோடு பெர்மிட் வைத்திருக்கிறது. (தமிழகத்தில் Form JJ; குஜராத்தில் Form 403; கர்நாடகத்தில் e-Sugam போன்றவை) இவற்றை அந்தந்த மாநிலங்கள் மட்டுமே பரிசீலிக்க முடியும். எனவே இதை எல்லாம் முற்றிலுமாக ஒழித்துவிட்டு,  E-Way Bill என ஒன்றை நாடு முழுமைக்குமான ஒரே ஆவணமாக அரசு அனுமதித்தது.

ஒவ்வொரு விற்பனையின் போதும் அது தொடர்பான ஆவணங்களை (SalesDocuments) GST வலைதளத்தில் பதிவேற்றி அதற்கான பிரத்யேகமான E-Way Billநம்பெரை வாங்கிக்கொள்ள வேண்டும். இந்த எண் நாடு முழுமையும் உள்ள அனைத்து மாநிலங்களின் வரி விதிப்பாளர்களுக்கும் பார்க்க அனுமதி உள்ளது. எந்த மாநிலத்தில் இருந்து எந்த மாநிலத்துக்கு சென்றாலும் வழியில் இதை பரிசீலித்து சோதனை செய்ய முடியும். அதனால் மாநில எல்லைகளில் உள்ள செக் போஸ்டுகள் நீக்கப்படும் என்றெல்லாம் அரசு சொன்னது. ஆனால் இப்போது அந்த திட்டம் 6 மாத காலத்துக்கு தள்ளி வைக்கப்பட்டு இருக்கிறது. இது மேலும் டாக்குமெண்டேஷன் சுமையை நிறுவனங்களுக்கு ஏற்றும். இப்போது போலவே பல்வேறு ரோடு பெர்மிட்டுகளை, செக்போஸ்ட் டிக்ளரேஷங்களை ஒவ்வொரு விற்பனைக்கும் கொடுத்துக்கொண்டே தான் இருக்கவேண்டும்.

இவை எல்லாவற்றையும் பார்க்கும்பொழுது, தெளிவில்லாத ஒரு குழப்பமான சட்டத்தை அரசு மக்களின் மீது வலுக்கட்டாயமாக திணித்துக்கொண்டிருக்கிறதோ என தோன்றுவது இயல்பு.

பொதுவான நோக்கில் GST மிக நல்ல விஷயம். ஆனால் அதை முற்றிலுமாக திருத்தி திருத்தி குழப்பியடித்து வைத்திருக்கிறது இப்போதைய அரசு. இது எந்த ஒரு முடிவும் எடுக்க முடியாத நிலையில் நிறுவனங்களை கட்டிப்போட்டு இந்தியா பொருளாதார தேக்கநிலைக்கு வழி வகுத்திருக்கிறது.

எல்லா குழப்பங்களையும் ஆராய்ந்து தெளிவு படுத்தி எளிமை படுத்தி, அதற்கு தக்க உட்கட்டமைப்புக்களையும் பயிற்சியும் கொடுத்து பின்னர் தெளிவான நோக்கத்தோடு கொண்டுவந்தால் GST பல நன்மைகளை செய்யும். அதனால் தான் செப்டம்பர் மாதத்துக்கு தள்ளி வைக்க சொல்லி பலரும் கோரிக்கை வைத்து இருக்கிறார்கள். ஆனால் அரசு அதை ஏற்றுக்கொள்ளுமா என தெரியவில்லை.

http://satheeshchennai.blogspot.in/

ஜி.எஸ்.டி.,யால் இந்தியாவில் வெளிநாட்டு முதலீடு அதிகரிக்கும் : தினமலர் விழிப்புணர்வு நிகழ்ச்சியில் தகவல்

ஜூலை 1 முதல், நாடு முழுவதும் ஜி.எஸ்.டி., எனும் சரக்கு மற்றும் சேவை வரி சட்டத்தை அமல்படுத்துகிறது மத்திய அரசு. 'இந்த வரியின் வருகையால் பொருட்களின் விலை கூடும், வரி செலுத்தும் முறைகள் மாறும்' என வணிகர்கள் பயம் கலந்த எதிர்பார்ப்பில் உள்ளனர்.

ஜி.எஸ்.டி., வரியை மேலோட்டமாக பார்த்தால் அதில் உள்ள நன்மைகள் வெளியே தெரியாது. அதன் விதிகளை ஒவ்வொன்றாக படித்துப் பார்த்தால் தான், நாட்டின் வளர்ச்சிக்கு எந்த அளவிற்கு உதவியாக இருக்கிறது என்ற உண்மை புரியும்.வணிகர்கள் வரி விதிகளை எல்லாம் படித்து, புரிந்து கொள்ளலாம். ஆனால், படித்தபின் வரும் சந்தேகங்களை அதற்குரிய நிபுணர்களிடம் கேட்டால் தானே தெளிவு பெற முடியும். இதற்காவே ஜி.எஸ்.டி., வரி குறித்து, வணிகர்களின் பயம் மற்றும் சந்தேகங்களை தீர்த்து வைக்க வேண்டும் என்ற நோக்கத்தில் மதுரை ராஜா முத்தையா மன்றத்தில் தினமலர் நாளிதழ் சார்பில் 'ஜி.எஸ்.டி., விழிப்புணர்வு நிகழ்ச்சி' நடந்தது. மதுரை தமிழ் இசைச் சங்க அறங்காவலர் மோகன் காந்தி வாழ்த்தி பேசினார்.அரங்க உதவி: தமிழ் இசைச் சங்கம், நாலேட்ஜ் பார்ட்னர்: ஸ்ரீ குரு கிருபா இன்ஸ்டிடியூட் ஆப் மேனேஜ்மென்ட்.

வரி பயங்கரவாத விடுதலை

இந்த நிகழ்ச்சியில் மதுரை தொழில் வர்த்தக சங்க முதுநிலை தலைவர் எஸ்.ரத்தினவேல் பேசியதாவது: ஜி.எஸ்.டி., வரி, பயங்கரவாதத்தில் இருந்து விடுதலை அளிக்கும் அருமையான சட்டம். உதாரணமாக அரிசிக்கு வரி விலக்கு உண்டு, அரிசி குருணைக்கு வரி உண்டா இல்லையா என சட்டத்தில் குறிப்பிடவில்லை. இப்படி வரி குறித்து சொல்லாத பொருட்களுக்கு 
அதிக வரி விதிக்கப்படுகிறது; இதுதான் 'வரி பயங்கரவாதம்' என்கிறோம்.மறைமுக வரிகள் 
இருக்காது ஜி.எஸ்.டி., வரவிற்கு பின் கூடுதல் வரிகள் மற்றும் இதுவரை நம் நாட்டில் இருந்த உற்பத்தி, சேவை, மத்திய விற்பனை, மதிப்புக்கூட்டு, ஆடம்பரம், கேளிக்கை போன்ற வரிகள் இனி இருக்காது. ஒவ்வொரு மாநிலங்களுக்கும் ஒரு வரி விதிப்பு முறை இருந்ததால்தான், நம் நாட்டில் வெளிநாட்டு முதலீடுகள் அதிகம் இல்லை. ஜி.எஸ்.டி., அமலுக்கு வந்த பின் நாடு முழுவதும் ஒரே முறையிலான வரிகள் விதிக்கப்படும். வரி குழப்பங்களால் விலகிப் 
போன வெளிநாட்டு முதலீட்டாளர்கள், நம் நாட்டில் முதலீடு செய்ய முன் வருவர்.

டெக்ஸ்டைல் துறையினர் வரவேற்பு : ஜி.எஸ்.டி., சட்டம் காலத்தின் கட்டாயம்; இதனால், வேலை வாய்ப்பு அதிகரிக்கும். நம் நாட்டின் மொத்த உற்பத்தியில் 3 சதவீதம் கூடும். டெக்ஸ்டைல் துறையினர் ஜி.எஸ்.டி., வரியை வரவேற்கின்றனர். இரண்டு கோடி பருத்தி விவசாயிகள் பயன் பெறுவர். ஜி.எஸ்.டி., 'ஒரு வரி சீர்திருத்தம்'. வணிகர்கள் பயப்பட தேவை இல்லை. இந்த சட்டத்தில் எதெல்லாம் சரக்கு, சேவை என்பதை தெளிவாக தெரிந்து கொள்ள வேண்டும். அதாவது, அசையும் பொருட்கள் எல்லாம் சரக்கு. இதில், ரூபாய், பங்குகள் மட்டும் சரக்குகள் இல்லை. சரக்குகள் அல்லாத அனைத்தும் சேவைகளாக எடுத்துக் கொள்ளப்படும்.

ஜி.எஸ்.டி., இணைய போர்டல் : ஜி.எஸ்.டி., வரி முழுவதும் ஜி.எஸ்.டி., இணையத் தளத்தில் தான் கணக்கிடப்படுகிறது. 'ஜி.எஸ்.டி., போர்டல் வணிக பில்கள் எல்லாம், ஒரு மாதத்திற்கு 300 முறை ஒப்பிட்டு பார்க்கும். வணிகர்கள் தங்கள் வணிக நடைமுறைகளை ஒவ்வொரு மாதமும் 10ம் தேதிக்குள் போர்டலில் பதிவு செய்ய வேண்டும். இவை அனைத்திற்கும் ஒரே ஒரு ரிட்டர்ன் தான். நாடு முழுவதும் ஒரே வரியாக இருப்பதால், சரக்குகளை எங்கு விற்றாலும் உள்ளீட்டு வரி (இன்புட் டாக்ஸ்) எடுத்துக் கொள்ள முடியும். வரிகளை முறையாக கையாள வேண்டியது வணிகர்களின் பெரிய கடமை.

வரிகளை இன்புட் எடுக்கலாம் : இந்த வரி சட்டத்தில் நிலக்கடலைக்கு 5 சதவீதம், கடலை மிட்டாய்க்கு 18 சதவீதம் வரி விதிக்கப்பட்டுள்ளது. இது போன்ற முரண்பாடுகள் அடுத்த ஜி.எஸ்.டி., கவுன்சில் கூட்டத்தில் சரி செய்யப்படும் என எதிர்பார்க்கிறோம்; இல்லை என்றால் நாங்கள் தொடர்ந்து வலியுறுத்துவோம். வணிக மேம்பாட்டிற்காக வாங்கும் பொருட்களின் வரிகளை திரும்ப பெற வணிகர்கள், விற்பனையாளரிடம் ஜி.எஸ்.டி., எண்ணை கண்டிப்பாக கொடுக்க வேண்டும். ஜூன் 30ல் உள்ள இருப்பு சரக்கிற்கு, ஜூலை 1 முதல் 28 சதவீதம் வரி என்றாலும், அதில் உள்ள கலால் வரியை இன்புட் எடுத்துக் கொள்ளலாம். இவ்வாறு பேசினார்.

மாநில அரசிற்கு மது வரி

ஜெ.பாலசுப்பிரமணியன், ஆடிட்டர், மதுரை : ஜி.எஸ்.டி., சட்டத்திற்கான விதை 1992ல் விதைக்கப்பட்டது. இந்த வரி முறையில் மதுவுக்கான வரி மற்றும் வருமானங்கள் மாநில அரசிற்கு தான் சொந்தம் என்று கூறப்பட்டுள்ளது. உள்மாநில வர்த்தகத்திற்கு சி.ஜி.எஸ்.டி., (மத்திய சரக்கு, சேவை வரி), எஸ்.ஜி.எஸ்.டி., (மாநில சரக்கு, சேவை வரி), இருமாநில வர்த்தகத்திற்கு இந்த இரண்டு வரிகளையும் இணைத்து ஐ.ஜி.எஸ்.டி., (ஒருங்கிணைந்த சரக்கு, சேவை வரி) விதிக்கப்படுகிறது.

மோடி ஒரு தீர்க்கதரிசி : ஒரு நிறுவன நிர்வாகம் தங்கள் தொழிலாளிக்கு 50 ஆயிரத்திற்கு மேல் பரிசுத் தொகை கொடுத்தால் கூட ஜி.எஸ்.டி., வரி கட்ட வேண்டும். முகவர்கள் முலம் சரக்குகளை கையாளும் போதும் வரி விதிக்கப்படும். நிலம், கட்டடம் சேவைகள் இல்லை என்பதால் அதற்கு ஜி.எஸ்.டி., வேண்டாம். ஒரு தொழிலாளி, முதலாளிக்கு செய்யும் சேவைக்கும் வரிகள் இல்லை. பிரதமர் மோடி ஒரு தீர்க்கதரிசி; அதனால் தான் வணிகர்களை ஒன்றிணைத்து செயல்பட வைக்க வேண்டும் என்ற நோக்கத்தில், வெளிப்படை தன்மையுடன் இந்த வரி விதிப்பு முறையை அறிமுகம் செய்கிறார்.

உற்பத்தி முதல் சப்ளை வரை : ஜி.எஸ்.டி.,வந்த பின் பதிவு செய்யாத வணிகரிடம் இருந்து, பதிவு செய்த வணிகர் சரக்கை வாங்கினால், பதிவு செய்த வணிகர் தான் வரியை செலுத்த வேண்டும். ஒன்றுக்கு மேற்பட்ட பொருட்களை வாங்கும் போது அதில், எந்த பொருளின் விலை அதிகமோ அதற்கு மட்டும் வரி செலுத்தினால் போதும். ஜி.எஸ்.டி.,யில் பொருள் உற்பத்தி செய்த இடத்தில் இருந்து, சப்ளை செய்யப்படும் இடம் வரை வரி விகிதங்கள் மாறுபடும். வணிகம் சார்ந்த தொலைபேசி, ரயில் பயணம் செய்யும் வணிகர்கள் தங்கள் ஜி.எஸ்.டி., எண்ணை பதிவு செய்து சேவை வரியை திரும்ப பெற்றுக் கொள்ளலாம்.வணிகர் ஒருவர் நுகர்வோரிடம் முன்பணம் வாங்கினால் அதற்கும் வரி செலுத்த வேண்டும். ஆனால், வாங்குபவர் பதிவு செய்திருந்தால் தான் அதில் உள்ள வரியை இன்புட் எடுக்க முடியும். அதனால், ஒவ்வொரு மாதமும் மறக்காமல் ரிட்டர்ன் தாக்கல் செய்ய வேண்டும். வணிகர்கள் தேவைக்கு மட்டும் சரக்குகளை வாங்கி இருப்பு வைத்திருந்தால் நல்லது.

விசிட்டிங் கார்டில் ஜி.எஸ்.டி., எண்

டி.ஆர்.சீனுவாசன், ஆடிட்டர், சென்னை : ஜி.எஸ்.டி., வந்த பின் வணிகர்கள் தங்கள் முதலீட்டை 3 மாதங்கள் சேமிக்க வேண்டும். ஒவ்வொரு மாதமும் 20ம் தேதிக்குள் வரி கட்டவில்லை என்றால், நம்மிடம் சரக்கு வாங்கியவருக்கு எந்த பயன்களும் கிடைக்காது. நாம் வரி கட்டவில்லை என்ற விஷயத்தை ஜி.எஸ்.டி., போர்டல் ஊருக்கே வெளிச்சம் போட்டு காட்டிக் கொடுத்துவிடும். அதே போல் ஜூன் 30க்குள் எவ்வளவு சரக்கு இருக்கிறது என்பதையும் அரசிற்கு சொல்ல வேண்டும். சாப்ட்வேர்களில் வணிக கணக்குகளை எழுதுவோர், அதை ஜி.எஸ்.டி.,க்கு ஏற்றபடி மாற்றி அமைக்க வேண்டும். பதிவு செய்யாத வணிகர்கள் ஜி.எஸ்.டி., பயிற்சியாளர்கள் மூலம் தாக்கல் செய்யலாம். இன்னும் 2 ஆண்டுகளில் ஜி.எஸ்.டி.,யில் 2 கோடி வணிகர்கள பதிவு செய்வார்கள் என எதிர்பார்க்கப்படுகிறது. இனி, வணிகர்கள் எங்கு சென்றாலும் ஜி.எஸ்.டி., எண்ணை காண்பிக்க வேண்டும். எனவே, வணிகர்கள் தங்கள் விசிட்டிங் கார்டுகளில் ஜி.எஸ்.டி., எண்ணை அச்சிட்டு வைத்துக் கொண்டால் வசதியாக இருக்கும்.

ஜூன் 15க்குள் ஜி.எஸ்.டி., பதியலாம்

எஸ்.சுந்தர்ராமன், ஆடிட்டர், சென்னை : ஜி.எஸ்.டி.,யில் பதிவு செய்யாத வணிகர்கள் ஜூன் 15க்குள் பதிவு செய்து கொள்ளலாம். ஆண்டுக்கு 20 லட்சத்திற்கு மேல் வரி கட்டுபவர்கள் அவசியம் பதிவு செய்ய வேண்டும். 20 லட்சத்திற்கு கீழ் வரி கட்டுபவர்கள் விரும்பினால் பதிவு செய்யலாம்; கட்டாயம் இல்லை. ஆன்லைன் மூலம் பொருட்களை விற்பனை செய்வோர்க்கு, 20 லட்சம் வரி என்ற கட்டுப்பாடுகள் இல்லை. சில மாநிலங்களுக்கு 10 லட்சம் வரி நிர்ணயிக்கப்பட்டுள்ளது. இதில், ஒவ்வொரு மாதமும் ரிட்டர்ன் தாக்கல் செய்யவில்லை என்றால், ஜி.எஸ்.டி., பதிவு ரத்து செய்யப்படும், இன்புட் வரிகளை திரும்ப பெற முடியாது.இந்த வரி விதிப்பு சட்டத்தால் பொருட்களின் விலை கூடும் என்ற பயம் வேண்டாம். 'வணிகர்களுக்கு அதிக லாபம் கிடைக்கும் போது, பொருட்களின் விலையை குறைக்க வேண்டும்' என கூறப்பட்டுள்ளது. வணிகத்திற்கான 'இன்வாய்ஸ்'ல் வரி, தள்ளுபடி என பிரித்து காண்பிக்க வேண்டும்.

பங்கேற்றவர்கள் சொன்னது என்ன?

வரி குறித்த பயம் நீங்கியது! : ஜி.எஸ்.டி., வரி குறித்து வர்த்தகர்கள் மத்தியில் ஒரு வித பயம் இருந்தது. அந்த பயத்தை நீக்கும் வகையில் சரியான நேரத்தில் நிகழ்ச்சியை தினமலர் நடத்தியது பாராட்டுக்குரியது. ஜி.எஸ்.டி., வரி குறித்த சந்தேகங்கள் அனைத்தையும் தீர்க்கும் வகையில் வல்லுனர்கள் விளக்கமளித்தனர். இந்த வரி அமலாக்கத்திற்கு பிறகு ஏற்படும் நிலையை கூட விளக்கினர். ஜி.எஸ்.டி., வரியால் வர்த்தகர்கள் பயம் கொள்ள தேவையில்லை என நிகழ்ச்சி தெளிவுபடுத்தி விட்டது. 'குட்ஸ் அண்ட் சர்வீஸ்' என, 132 வெளிநாடுகளிலும் இத்தகைய வரியுள்ளது. ஏதோ இந்தியாவில் மட்டுமே இத்தகைய வரி விதிக்கப்படவில்லை.

என்.ஜெகதீசன், தமிழ்நாடு தொழில் வர்த்தக சங்கத் தலைவர்

பயனுள்ளதாக இருந்தது : ஜூலை முதல் தேதியிலிருந்து ஜி.எஸ்.டி., வரி அமலாகவுள்ள நிலையில் இந்நிகழ்ச்சியை தினமலர் நடத்தியது பயனுள்ளதாக இருந்தது.

எஸ்.பி.ஜெயப்பிரகாசம், தமிழ்நாடு உணவுப்பொருள் வியாபாரிகள் சங்கத் தலைவர்

நிகழ்ச்சி நேர மேலாண்மை : ஜூலை 1 முதல் ஜி.எஸ்.டி., வருமா, வராதா என்ற சந்தேகத்துடன் வந்தோம். நிச்சயம் அமலாகும். பயனுள்ளதாக இருக்கும் என்று நிபுணர்கள் தெரிவித்தனர். பல சந்தேகங்களுக்கு, பதில் கிடைத்தது. முக்கியமான விஷயம்... தினமலர் நாளிதழின் நிகழ்ச்சி 
நேர மேலாண்மை சூப்பர்.

பிரேம்குமார், சவுராஷ்டிரா சேம்பர் ஆப் காமர்ஸ், மதுரை

முழுமையாக புரிந்தது : நிகழ்ச்சி பொது மக்களுக்கும், வணிகர்களுக்கும் பயனுள்ளதாக இருந்தது. ஜி.எஸ்.டி., வரி குறித்து, தினமலர் ஏற்பாடு செய்த விழிப்புணர்வு நிகழ்ச்சியை பாராட்டுகிறோம். ஜி.எஸ்.டி.,யை புத்தகம் மூலம் தெரிந்து கொள்ள பல நாட்கள் ஆகும். ஆனால், வெறும் மூன்றே மணி நேரத்தில் ஜி.எஸ்.டி., வரியை புரியவைத்துவிட்டனர். மதுரையில் மீண்டும் ஒரு சித்திரை திருவிழா கூட்டத்தை பார்த்து வியந்து போனேன்.

வி.கிருஷ்ணமூர்த்தி, முன்னாள் செயலாளர், எண்ணெய் வியாபாரிகள் சங்கம்.

தெளிவு பிறந்தது... பயம் நீங்கியது! : தேர்வுக்கு செல்லும் மாணவனின் மனநிலையில் நானும், எங்கள் சங்க உறுப்பினர்களும் வந்தோம். ஜி.எஸ்.டி., நல்லதா, கெட்டதா என்ற குழப்பத்துடன் வந்த எங்களுக்கு, நிபுணர்கள் அளித்த பதில்களால் தெளிவு ஏற்பட்டது. ஜி.எஸ்.டி.,க்கு நாங்கள் தயாராகிவிட்டோம். எங்கள் சங்க உறுப்பினர்களுக்கு தினமலர் நாளிதழில் வெளிவந்த, வெளிவரும் ஜி.எஸ்.டி., செய்திகளை அனுப்பி விழிப்புணர்வு ஏற்படுத்த திட்டமிட்டுள்ளோம்.

கே.எல்.குமார், தலைவர், மதுரை ஓட்டல் உரிமையாளர்கள் சங்கம்

நேர்த்தியான ஏற்பாடு : நிகழ்ச்சி ஏற்பாடுகள் மிக நேர்த்தியாக, சிறப்பாக இருந்தது. ரத்தினவேல் மற்றும் ஆடிட்டர்கள் ஜி.எஸ்.டி., குறித்த பொதுவான கருத்துக்களை தெளிவாக விளக்கி கூறினார்கள். கணக்குகளை கையாளும் முறைகள் குறித்தும் தெரிந்து கொண்டது பயனுள்ளதாக இருந்தது.

எஸ்.சங்கர சீத்தாராமன், நிர்வாக இயக்குனர், விஸ்வாஸ் புரமோட்டர்ஸ்.

நிரம்பி வழிந்த அரங்கம் : ஜி.எஸ்.டி., குறித்து தெரிந்து கொள்ள வேண்டும் என்ற ஆர்வத்தில் வணிகர்கள், வர்த்தகர்கள், கணக்கு, தணிக்கை அலுவலர்கள், பொதுமக்கள், கல்லுாரி மாணவர்கள் என ராஜா முத்தையா மன்றத்தின் அரங்கம் முழுவதும் கூட்டத்தில் ரம்பி 
வழிந்தது. அரங்கிற்குள் இடம் இல்லாத காரணத்தால், வெளியே நின்றவர்கள் நிகழ்ச்சியை பார்க்க வசதியாக, அருகில் உள்ள அரங்கில் பெரிய திரையில் நிகழ்ச்சி ஒளிபரப்பப்பட்டது.

'ஜி.எஸ்.டி.,' ஒரு பாகுபலி

நிகழ்ச்சிக்கு வந்திருந்த இளைஞர் ஒருவர் ஜி.எஸ்.டி., கூட்டத்தை பார்த்து 'பாகுபலி' படத்திற்கு கூட இவ்வளவு கூட்டம் வந்ததில்லை என வியப்புடன் கூறிச் சென்றார்.''காலம் பொன் போன்றது என்பதை சரியாக புரிந்து கொண்டு, அறிவித்தவாறு சரியாக 10:00 மணிக்கு நிகழ்ச்சி துவங்கி 1:00 மணிக்கு நிறைவு பெற்றது. இப்படி நடத்துவதில் தினமலர் நாளிதழுக்கு நிகர், தினமலர் நாளிதழ் தான்,'' என பல வர்த்தகர்கள் கருத்து தெரிவித்தனர்.

ஜி.எஸ்.டி., கேள்வி - பதில் 

நிகழ்ச்சியின் முடிவில் வணிகர்கள் கேட்ட கேள்விகளுக்கு நிபுணர்கள் அளித்த பதில்கள்...
* எவ்வளவு ரூபாய்க்கு மேல் இ.வே., பில் தேவை
50 ஆயிரம் ரூபாய்க்கு மேற்பட்ட வணிகத்திற்கு இ.வே., பில் அவசியம்.
* பொருட்களின் விலை குறையுமா
ஜி.எஸ்.டி.,யில் சில பொருட்களுக்கு ஏற்கனவே இருந்த கலால், மதிப்புக்கூட்டு வரிகளின் கூட்டுத் தொகையை விட, வரிகள் குறைவாக இருப்பதால் விலை குறையும்.
* வரி நிர்ணயம் செய்யப்பட்டுள்ள பொருட்களின் எண்ணிக்கை
1211 பொருட்களுக்கு நிர்ணயம் செய்துள்ளனர், சுமார் 80 பொருட்கள் வரி விலக்கு பெற்றுள்ளது.
* ஜி.எஸ்.டி., வரி விகிதங்கள்
சரக்கு, சேவைகளின் தன்மைக்கு ஏற்ப 5, 12, 18, 28 சதவீதங்கள்.
* ஓட்டல் உணவுகளுக்கு எவ்வளவு வரி
ஏ.சி., ஓட்டல்களுக்கு 18, ஏ.சி., இல்லாத 
ஓட்டல்களுக்கு 12 சதவீதம்.

சந்தேகமா கேளுங்கள் : தினமலர் ஜி.எஸ்.டி., விழிப்புணர்வு நிகழ்ச்சியில் சந்தேகங்களுக்கு விளக்கம் பெற இயலாத வணிகர்கள், பெயர் மற்றும் அலைபேசி எண்ணை குறிப்பிட்டு, ஜி.எஸ்.டி., சந்தேகம், தினமலர், மதுரை 16 என்ற, முகவரிக்கு எழுதலாம். mdureporting@dinamalar.inக்கு மின்னஞ்சல் மூலம் கேள்விகளை அனுப்பலாம். பதில்கள் தினமலர் நாளிதழில் வெளியாகும்.

http://www.dinamalar.com/news_detail.asp?id=1786556

ஜி.எஸ்.டி (GST) – என் பார்வையில் – 5

கடந்த மார்ச் 31 ஆம் தேதி நடந்த ஜி.எஸ்.டி கவுன்சில் கூட்டம் மிக மிக முக்கியமானது. ஏனெனில் இந்திய தொழில் வளர்ச்சியை பாதிக்கும்/தீர்மானிக்கும் முடிவுகளை அன்று அவர்கள் எடுத்திருந்தார்கள். அது என்ன அவ்வளவு முக்கியமான முடிவுகள்? ஒண்ணொண்ணா பார்ப்போமா?

முதலாவதாக, ஏற்கனவே முடிவு செய்து வைத்திருந்த 5 விதிகளை (Invoice Rules; Payment Rules; Refund Rules; Registration Rules; Return Rules) சிறு சிறு மாற்றங்களுடன் இறுதி செய்திருக்கிறார்கள்.

அடுத்ததாக மீதமுள்ள 4 விதிகளை (Input Tax Credit Rules; Transitional Provision Rules; Valuation of Supply Rules; Composition Scheme Rules) கொள்கை அளவில் ஒப்புக்கொண்டு இருக்கிறார்கள். அடுத்த கவுன்சில் கூட்டம் நடக்கும் பொழுது,இந்த 4 விதிகளும் விரிவாக விவாதிக்கப்பட்டு, ஏதேனும் மாற்றங்கள் தேவைப்பட்டால் அவை கவனத்தில் எடுத்துக்கொள்ளப்பட்டு இறுதி செய்யப்படும்.

மூன்றாவது முடிவு தான் மிக முக்கியமானது. அதாவது அடுத்த கூட்டம் மே மாதம் 18, 19 ஆகிய தேதிகளில் ஸ்ரீநகரில் நடக்கும் என்பது. அதில் என்ன அவ்வளவு முக்கியத்துவம் என்கிறீர்களா?

பிரதமர் மோடியும் அவரது கட்சியினரும் ஜூலை 1 ஆம் தேதி முதல் ஜி.எஸ்.டியை அமல்ப்படுத்தியே ஆகவேண்டும் என முழங்கி கொண்டு இருக்கிறார்கள். ஆனால் கவுன்சிலோ ஏப்ரல் மாதத்தில் கூடுவதாக இல்லை.அடுத்த கூட்டம் மே 18,19 தான். அதில் விவாதிக்கப்படும் திருத்தங்கள் இறுதி செய்யப்பட்டு அனேகமாக மே 25க்குள் பாராளுமன்றத்தில் தாக்கல்செய்யப்படும் என நினைக்கிறேன். அது விவாதிக்கப்பட்டு வெற்றிபெற அனேகமாக மே 30ஆகலாம்.

அதன் பின்னர் இறுதி செய்யப்பட்ட அந்த விதிகளின் அடிப்படையில் 32மாநிலங்களும் புதிதாக சட்டங்கள் இயற்றி தங்கள் சட்டசபைகளில் சட்டத்தை தாக்கல் செய்து வெற்றி பெறச்செய்து, குடியரசு தலைவரின் ஒப்புதலை பெற்றால் தான் சட்டம் முழுமை பெறும். இது முடிய எப்படியும் ஜூன் 25ஆகலாம்.

இப்படி இருக்க ஜூலை 1 ல் அமல்ப்படுத்துவது என்பது நடக்காத காரியம்.அரசுக்கே அப்படி ஒரு எண்ணம் இல்லை. இருந்திருந்தால் ஏப்ரல் மாதம் முழுக்க சும்மா இருக்க வேண்டிய அவசியமே இல்லை.

தொழில் வர்த்தக நிறுவனங்களை பொறுத்தவரை, இப்போதைக்கு குருடர்கள் தடவிப்பார்த்த யானை போல தான் இருக்கிறது ஜி.எஸ்.டி. முழுமையாக எந்த விவரமும் இறுதி செய்யப்படவில்லை. அப்படி ஏதேனும் இறுதி என சொல்லப்பட்டு அதன் அடிப்படையில் தங்கள் வியாபாரத்தை கணக்கிட்டு ஒரு முடிவுக்கு வரும் முன்னர் அந்த ‘இறுதி’ செய்யப்பட்ட சட்டத்தில் ஒரு திருத்தம் கொண்டு வந்து மீண்டும் குழப்பி விடுகிறார்கள்.

சரி, அரசு பல வகையான பிரச்சனைகளையும் விரிவாக ஆராய்ந்து வருவதால் பல பல திருத்தங்களை தேவைக்கு ஏற்ப செய்துகொண்டே வருகிறது. அதில் தவறு இல்லை. இதில் தொழில் நிறுவனங்களுக்கு என்ன பிரச்சனை?

தொழில் நிறுவனங்களுக்கு இப்போதைக்கு ஜி.எஸ்.டி தங்கள் தொழிலை எப்படி பாதிக்கும் என்பதே புரியவில்லை. எல்லா சட்டங்களும் இறுதி செய்யப்பட்டால் தான் ஒரு தெளிவான பிக்சர் கிடைக்கும். அதன் பின் அது தங்கள் தொழிலுக்கு சாதகமா பாதகமா என ஆராய்ந்து அதற்கு தகுந்த படி தங்களின் வியாபார திட்டங்களை வகுக்க வேண்டும்.

இது தவிர, தங்களின் கணக்குகளை இரு வகையாக பிரிக்கவேண்டும்.ஜி.எஸ்.டிக்கு முன், ஜி.எஸ்.டிக்கு பின். இரு வகையாக பிரித்தால் தான் தெளிவான வரி தாக்கல் செய்யமுடியும். ஏதேனும் சிறு பிழை இருந்தாலும் ஜி.எஸ்.டி சட்டப்படி ‘கைது’ நடவடிக்கையே எடுக்க முடியும்.

எனவே தொழில் நிறுவனங்கள், எல்லா சட்ட விதிகளையும் அறிந்து அதன் அடிப்படையில் தான் தங்களது கணக்கு வழக்குகளை நிர்வகிக்க முடியும்.அரசே ஜூன் மத்தியில் தான் எல்லாவற்றையும் இறுதி செய்யும் எனில்,அதன்பின் தங்களது கணக்கியல் மென்பொருளை (Billing/Accounting Software) மேம்படுத்தி அது தொடர்பாக தங்களது பணியாளர்களுக்கு பயிற்சி அளித்து முழுமையாக தயாராக எப்படியும் குறைந்தது மூன்று மாதங்களேனும் தேவை என்பதை வலியுறுத்தி வருகின்றனர். எனவே செப்டம்பர் 1 ஆம் தேதி தான் அமலாக வாய்ப்பு உள்ளது. ஆனாலும் அரசு ஏனோ ஜூலை 1 முதல் அமல்ப்படுத்த கட்டாயப்படுத்தி வருகிறது.

இப்போதைய வரி முறையில் இருந்து ஜி.எஸ்.டி வரிமுறைக்கு மாறுகையில் தற்போது கையிலிருக்கும் ஸ்டாக் விவரங்களை தாக்கல் செய்ய வேண்டி இருக்கும். ஜூலையா செப்டம்பரா என தெரியாத நிலையில் கொள்முதல் திட்டமிடுதலை கூட முறையாக செய்யமுடியாத அவல நிலைக்கு எல்லாவரையும் தள்ளி இருக்கிறது முன்னேற்பாடு இல்லாத இவ்வரசு.

இப்போது நாமே நமது வரியை தாக்கல் செய்ய முடியும். ஆனால் ஜி.எஸ்.டி முறையில் அரசினால் அங்கீகரிக்கப்பட்ட வரி ஆளுனர்கள் (GSP - GST Service Providers) தான் நம் சார்பாக வரி செலுத்த வேண்டி வரும். அவர்களிடம் நாம் நமது கணக்கு விவரங்களை கொடுத்தால் போதும். மற்றதை அவர்கள் பார்த்துக்கொள்வார்கள். இதற்கு ஒவ்வொரு பரிவர்த்தனைக்கும் தனித்தனி கட்டணம் இருக்கும். இந்த கூடுதல் செலவை சமாளிக்க தங்களிடம் இருக்கும் பணியாளர்கள் எண்ணிக்கையை குறைக்கவேண்டிய நிலையில் தொழிற்சாலைகள் இருக்கின்றன. மேலும் அதிக பணியாளர்கள் ஜி.எஸ்.டிக்கு தேவை இல்லை. கணிப்பொறி மென்பொருள் (ERP) பக்காவாக இருந்தால் அதிலிருந்து ரிப்போர்ட் எடுத்து ஜி.எஸ்.டி வரி தாக்கல் செய்யும் நிறுவனத்துக்கு கொடுக்க என ஒன்றிரண்டு பேர் இருந்தாலே போதும். எனவே வணிகவியல் பட்டதாரிகளின் வேலை இழப்பை விரைவில் எதிர்பார்க்கலாம்.

இது தவிர சிறு குறு வியாபாரிகளின் நிலைமை தான் மிக மோசம்.ஜி.எஸ்.டியினால் அதிகம் பாதிக்கப்படப்போவது அவர்கள் தான். அதாவது,சாதாரண வியாபாரிகள் தங்கள் பொருட்களை வாங்கிய போது செலுத்திய வரியினை கழித்து (Set-Off) விற்பனை செய்வதால் விலை குறைவாக இருக்கும். ஆனால் ரூ 50 லட்சத்துக்கும் கீழ் டர்ன் ஓவர் இருக்கும் சிறு வியாபாரிகள் ‘கம்போசைட்’ முறையில் வரி செலுத்துவோர் என கொள்வதால்,அவர்களால் செலுத்திய வரியை கழித்துக்கொள்ளும் வசதி இல்லை. மேலும்1% வரி விதித்து விற்பனை செய்யவேண்டும். எனவே விலைவாசி அபரிமிதமாக ஏறும். அல்லது தொழிற் நிறுவனங்கள், சிறு குறு வியாபாரிகளிடம் இருந்து பொருட்களை வாங்குவதை தவிர்க்க வேண்டி வரும். ஏனெனில் பெரும் வியாபாரிகளிடமிருந்து வாங்கும் பொருட்களை விட சிறு வியாபாரிகளிடம் இருந்து வாங்கும் பொருட்களுக்கு 18% கொள்முதல் வரியும் 1% விற்பனை வரியும் சேர்த்து அதிக விலை கொடுக்க வேண்டி வரும். மேலும் அப்படி விலை கொடுத்து வாங்கினாலும் அந்த வரியை கழித்துக்கொள்ளும் வசதி (ITC Set Off) இல்லாததால் யாரும் சிறு குறு வியாபாரிகளிடம் வாங்க மாட்டார்கள். இது நாளாவட்டத்தில் சிறு குறு வியாபாரிகளை முற்றிலுமாக ஒழித்து விடக்கூடும்.

இப்போது வெளி மாநில உற்பத்தியாளர்களிடம் இருந்து வாங்கும் பொருட்களுக்கு வரிக்கழிவு வசதி இல்லாததால், அவர்கள் ஒவ்வொரு மாநிலத்திலும் வேர் ஹவுஸ்/குடோன் வைத்து அதற்கு தங்கள் பொருட்களை ஸ்டாக் டிரான்ஸ்ஃபர் முறையில் வரியின்றி மாற்றி அங்கிருந்து உள்ளூர் வரி செலுத்தி விற்பனை செய்து வருகிறார்கள். இதன் மூலம் பல பல நிறுவனங்களின் வேர்ஹவுஸ் / குடோன்கள் மூலம் பல லட்சக்கணக்கான பேர் வேலை வாய்ப்பு பெற்று வருகிறார்கள்.

ஜி.எஸ்.டி சட்டம் வெளிமாநில பொருட்களுக்கும் வரிக்கழிவு தருவதால் இனி இப்படியான வேர் ஹவுஸ் தேவை இல்லை. தொழிற்சாலைகளே நேரடியாக இந்தியா முழுதும் விற்றுக்கொள்ள முடியும். இதனால் ஏற்படக்கூடிய வேலை இழப்பு எவ்வளவு என்பதை கணக்கிட்டு பார்த்தால் மலைப்பாக இருக்கிறது.சிறு குறு தொழில் மற்றும் இது போன்ற துணை தொழில்களின் அழிவு ஆகியவை, அடுத்த இரண்டொரு வருடங்களில் மிகப்பெரிய வேலைவாய்ப்பின்மை இந்தியாவை பெரும் சிக்கலுக்குள்ளாக்கினாலும் ஆச்சர்யம் இல்லை.

தொழில் நிறுவனங்களுக்கு எளிமையான முறையாக இருக்கும் ஜி.எஸ்.டி சமூக பொருளாதார நோக்கில் இந்தியாவில் மிகப்பெரிய பாதிப்பை ஏற்படுத்தும்.

உற்பத்தி மாநிலங்களுக்கு குறைந்த வரி வருவாயும் உபயோகிப்பாளர் மாநிலத்துக்கு அதிக வரி வருவாயும் கிடைப்பது போல் வடிவமைக்கப்பட்டிருக்கும் ஜி.எஸ்.டி வரி முறை நம்மை போல வளர்ச்சியை நோக்கிய மாநிலங்களுக்கான பெருத்த தண்டனையாக வந்திருக்கிறது. அதை தான் மாண்புமிகு தமிழக முதல்வராக இருந்த புரட்சித்தலைவி ஜெயல்லிதா அவர்கள் தெளிவாக குறிப்பிட்டு ஜி.எஸ்.டி வரி விதிப்பை முழுமையாக எதிர்த்தார். மேலும் இந்தியா முழுதும் அமலானாலும் தமிழகம் அமல்ப்படுத்தாது என சொல்லியதற்கும் நியாயமான காரணங்கள் உள்ளன. அவர் மறைந்துவிட்ட நிலையில் இப்போதிருக்கும் அரசு ஜி.எஸ்.டி வரிவிதிப்பை ஆர்வத்தோடு அமல்ப்படுத்த முயற்சி எடுத்து வருகிறது.

இவை பற்றியெல்லாம் அடுத்த பதிவில்.

http://satheeshchennai.blogspot.in/2017/04/gst-5.html

ஜி.எஸ்.டி (GST) – என் பார்வையில் – 4

ஒரு வழியாக ஜி.எஸ்.டி பாராளுமன்றத்தில் நிறைவேற்றப்பட்டு விட்டது. ஆனால் அதில் எனக்கு சில வருத்தங்கள் உள்ளன.

இந்தியா முழுமைக்குமான வரி சீர்திருத்தமான ஜி.எஸ்.டி மசோதாவை இரு அவைகளிலும் அறிமுகம் செய்து விவாதத்துக்கு உட்படுத்தி நிறைவேற்றுவதற்கு பதிலாக, பண மசோதாவாக (Money Bill) மக்களவையில் மட்டும் நிறைவேற்றி இருக்கிறார்கள். மாநிலங்களவையில் அது தோற்றாலும் பிரச்சனை இல்லை.

இதற்கான காரணங்கள் அரசியல் ரீதியானவை.

அதாவது பாஜகவுக்கு மக்களவையில் மட்டுமே பெரும்பான்மை இருக்கிறது. மாநிலங்கள் அவையில் இல்லை. பொதுவாக இதுபோன்ற அதி தீவிர முக்கியத்துவம் வாய்ந்த சட்டங்கள் இயற்றப்படும்போது இரு அவைகளிலும் உள்ள அனைத்து உறுப்பினர்களின் கருத்துக்களையும் கேட்டு முடிவெடுப்பது தான் இது வரையும் இருந்த வழக்கம். ஆனால் அத்தகைய மன முதிர்ச்சி இல்லாததாலோ என்னவோ அரசியல் வாக்குகள் எண்ணிக்கைகளை கருத்தில் கொண்டு மக்களவையில் மட்டும் நிறைவேற்றப்பட்டு இறுதி செய்யப்பட்டு இருக்கிறது.

இதன் பலனாக நாட்டு நலன் கருதியும் வர்த்தக வசதிக்காகவும் எதிர்க்கட்சிகள் கொண்டு வந்த சில திருத்தங்களை, தனக்கிருந்த அபரிமிதமான பலத்தின் அடிப்படையில் பாஜக புறக்கணித்துவிட்டது. அதுமட்டும் அல்லாமல், AntiProfiteering rule போன்ற சில கொடுமையான விதிமுறைகளையும் புகுத்தி இந்த சட்டத்தை தன்னிச்சையாக நிறைவேற்றி இருக்கிறது.

போகட்டும். இப்போதைக்கு நம்மிடம் இருக்கும் இந்த புதிய ஜி.எஸ்.டி என்ன சொல்கிறது என பார்ப்போம்.

திருத்தப்பட்ட மாதிரி ஜி.எஸ்.டி சட்டத்தில் (Revised Model GST Law – RMGL)சொல்லப்பட்டிருந்த பல விஷயங்கள் இப்போது அறிமுகப்படுத்தப்பட்ட 4 சட்ட மசோதாக்களில் மீண்டும் மாற்றப்பட்டு இருக்கின்றன.

அதென்ன 4 சட்ட மசோதாக்கள்?

CGST – Central GST – Excise & Service Tax ஆகியவற்றுக்கு பதிலாக.

IGST – Integrated GST – CST க்கு பதிலாக.

UTGST – Union Territory GST – மத்திய ஆளுகைக்கு உட்பட்ட பகுதிகளின் வரம்புக்குள் விதிக்கப்படும் சட்டத்துக்காக.

Compensation Law – நிதி வருவாய் பகிர்மானம் தொடர்பாக.

இது தவிர மாநிலங்கள் அவரவர் மாநிலங்களுக்கு என்று தனித்தனியாக SGST –State GST – உருவாக்கவேண்டும்.

எனவே – நான்கு வகையான வரிவிதிப்பு முறைகள் (CGST, IGST, SGST, UTGST),அதில் ஐந்து வகையான வரி விகிதங்கள் (0%, 5%, 12%, 18%, 28%) என மிக மிக சிக்கலான ஒரு அமைப்பை கொண்டு வந்திருக்கிறார்கள். எனவே நாடு முழுமைக்குமான ஒரே வரிவிகிதம் என யாரேனும் (பிரதமரே ஆனாலும்) ஜல்லி அடித்தால் அப்படியா என வாயை பிளந்துகொண்டு நம்பிவிட வேண்டாம். மற்றுமொரு சந்தோஷ செய்தியாக சமீபத்திய சட்ட திருத்தத்தின் மூலம், உச்ச பட்ச வரி என்பது 28% லிருந்து 40% ஆக உயர்த்த (பாராளுமன்றத்தில் அனுமதி பெறாமலேயே உயர்த்த!) வழிவகை செய்யப்பட்டுள்ளது.  எனவே வரிவிகிதம் எக்கச்சக்கச்சக்கமாக ஏறும் என எதிர்பார்க்கலாம்.

GST யினால் விலைவாசி குறையும் என யாரேனும் சொன்னால் அதையும் அப்படியே நம்பிவிட வேண்டாம். இடை நிலை நிறுவனங்கள், வர்த்தக டீலர்கள் ஆகியோருக்கு (செலுத்திய வரியை செட் ஆஃப் செய்யும் வசதியின் காரணமாக) எளிமையாக இருந்தாலும் கடைநிலை உபயோகிப்பாளரின் நிலை மிக துயரமானதாக மாறும். இப்போது 5% வரி செலுத்தி வாங்கிக்கொண்டிருக்கும் பொருளுக்கு இனி 18% வரி செலுத்தி வாங்க வேண்டும். அந்த வரியை அவனால் எதிலும் கழித்துக்கொள்ள முடியாது.(இடை நிறுவனங்கள் தாங்கள் செலுத்திய வரியை, செலுத்த வேண்டிய வரியுடன் கழித்துக்கொள்ளலாம்)

மேலும் இடை நிறுவனங்கள் கூட, இரண்டு மாதம் வரையிலும் தாங்கள் வாங்கும் பொருட்களுக்கு செலுத்தும் வரிக்கான Working Capital முடக்கி வைக்கவேண்டிய நிலையில் இப்போதைய 5% என்பது 18% என உயர்கையில் அந்த Working Capital தொகையின் அளவு கூடும். பின்னாளில் அந்த தொகை திரும்ப கிடைக்கும் என்றாலும் கூட தினசரி அடிப்படையில் பெரும் தொகையை முடக்கி வைக்க வேண்டும் என்பது பெரும் நிதிச்சுமையை ஏற்படுத்தும். ஏனெனில் மும்மடங்காக அல்லவா உயர்த்தப்பட்டு இருக்கிறது?

வெளிமாநில கொள்முதலுக்கு இதுவரையும் வரி அட்ஜஸ்ட்மெண்ட் செய்யும் வசதி இல்லாததால் பெரும் தொழிற்சாலைகள் ஒவ்வொரு மாநிலத்திலும் வேர் ஹவுஸ் / குடோன் அமைத்து அதற்கு தங்களின் பொருட்களை ஸ்டாக் டிரான்ஸ்ஃபர் முறையில் வரியின்றி அனுப்பி அங்கிருந்து உள்ளூர் விற்பனையாக அந்தந்த மாநிலங்களில் விற்று வந்தனர். இதன் மூலம் பல சிறிய டீலர்கள், சப்-டீலர்கள் தொழில் நடத்தி வந்தனர்.

இப்போது வெளிமாநில கொள்முதலுக்கு வரி அட்ஜஸ்ட்மெண்ட் செய்யும் வசதி இருப்பதால், நேரடியாக தொழிற்சாலையிலிருந்தே விற்பனை செய்யலாம். வாங்குவோரும் அதை தான் விரும்புவார்கள். இதன் பிற பலாபலன்களாக டீலர், சப்டீலர் முறைகள் குறையும். அது வேலையின்மையை அதிகரிக்கும். நிறைய வேலையிழப்பை நாம் எதிர்பார்க்கலாம்.

சாலை வழியே எடுத்து செல்லப்படும் பொருட்களுக்கு பில் / இன்வாய்ஸ் அவசியம் இல்லை என இப்போதைய திருத்தப்பட்ட சட்டம் சொல்கிறது. அதாவது விற்பனையாளர், தனது பில்லை GSTN எனும் நெட்வர்க்கில் பதிவேற்றி அதற்கான Reference Number வாங்கினால் போதும். அதை வைத்து பொருட்களை எடுத்து செல்லலாம். வழியில் சோதனை செய்வோர் தங்களிடம் இருக்கும் கைகணினி மூலம் அந்த Number Verify செய்து வாகனத்தை அனுமதிப்பார்கள். சுலபமாக தெரிந்தாலும், இது மிகப்பெரிய அளவிலான வரி ஏய்ப்புக்கு வழி வகுக்கும். ஏனெனில், செக் போஸ்ட் எல்லாவற்றையும் நீக்க சொல்லி இருப்பதால் எல்லா வாகனங்களும் சோதனை செய்யப்பட மாட்டாது. Random அடிப்படையில் ஒரு சில வண்டிகள் மட்டுமே சோதிக்கப்படும். அதிலும் பில்லோ இன்வாய்ஸோ வேண்டும் என்பது கட்டாயமில்லை. இது வரி ஏய்ப்பு செய்வோருக்கு மிகுந்த சந்தோஷத்தை கொடுக்கும் செய்தி ஆகும்.

இந்த GSTN என்பது தனிக்கதை.  இது ஒரு அரசு & தனியார் பங்களிப்புடனான தனிப்பட்ட நிறுவனம். மத்திய அரசு 24.5%; மாநில அரசுகள் எல்லாவருமாக சேர்ந்து 24.5% தனியார் நிறுவனங்கள் பலவும் சேர்ந்து 51% பங்குகளை வைத்திருக்கின்றன. இவர்கள் தான் வரி வசூல்,நிதி நிர்வாகம், மாநிலங்களுக்கான நிதி பங்கீடு ஆகியவற்றை செய்யப்போகிறார்கள். இதில் தணிக்கை செய்யும் உரிமை கூட CAG க்கு கிடையாது. 

எனவே இந்த நிதி நிர்வாகத்தை எப்படி மேற்கொள்ள போகிறார்கள், யாரும் கேள்வி கேட்க உரிமையில்லாத நிலையில் அந்த தனியார் நிறுவனங்கள் எந்த அளவுக்கு நேர்மையாக பணத்தை கையாளும் (ஒவ்வொரு மாதமும் 3 லட்சம் கோடி ரூபாய் வரி வருவாய் என்பதை வைத்து கணக்கீட்டு கொள்ளுங்கள்) என்பதெல்லாம் கேள்வி குறியே. அதனால் தான் “தனியார் நிறுவனங்களை GSTN அமைப்பிலிருந்து நீக்கவேண்டும் இல்லாவிட்டால் வழக்கு போடுவேன்” என சுப்பிரமணியம் சுவாமி சொல்லி இருக்கிறார்.

இதில் மற்றொரு பிரச்சனை என்னவென்றால் இந்த GSTN தளத்தில் நமது வியாபார விஷயங்களை தாக்கல் செய்ய நமக்கு அதிகாரம் இல்லை. அதற்கென GSP இருக்கிறது. 20 GSPக்கள் இந்தியாவில் இருக்கிறார்கள். அவர்களில் ஒருவர் மூலமாக தான் இந்த GSTN தளத்தில் நமது வியாபார விபரங்களை பதிவேற்ற முடியும். அந்த வகையில் அந்த GSP நிறுவனங்களும்,அவர்களால் நியமிக்கப்படும் ASP நிறுவனங்களும் நல்லா சம்பாதிக்க முடியும். அதாவது நான் என்ன வியாபாரம் செய்தேன் என்பதை நானே இப்போது வரி தாக்கல் செய்துவிடுவது போலல்லாமல் இனி அவர்களிடம் கொடுத்து தான் தாக்கல் செய்யவேண்டும். அதற்கு தனியாக கட்டணம் உண்டு.

பெரும் நிறுவனங்கள் இதை செய்துவிடும். ஆனால் சிறு வணிகர்கள் நிலைமை?

முழுமையான ஏலக்டிரானிக் வரி நிர்வாகமான GST வழியாக நேர்மையாக வரி செலுத்தவேண்டும் என்கிற எண்ணமுடைய சிறு வணிகர்கள் அதற்காக கம்பியூட்டர், இண்டெர்னெட் வசதி, GST வசதியுள்ள ERP சிஸ்டம், அதை கவனிக்க ஒரு வணிகவியல் பட்டதாரி, வரி தாக்கல் செய்ய ஒரு ASP மற்றும் அதன் முழுமையான பரிவர்த்தனைக்கு என ஒரு GSP என பல விஷயங்களை ஏற்படுத்திக்கொள்ள வேண்டி இருக்கும். இது திடீரென்று ஏற்படும் ஒரு பெரும் நிதி சுமை. நாளாவட்டத்தில் சிறு வணிகர்கள் என்கிற ஒரு வகையினரே இல்லாமல் பெரு வணிகர்களும் கார்போரெட்டுக்களும் மட்டுமே கோலோச்சும் ஒரு காலகட்டம் வந்தால்  கூட ஆச்சரியப்படுவதற்கில்லை.

ஜாப் வர்க் விஷயங்களுக்காக அனுப்பப்படும் பொருட்கள் இப்போது 6 மாதங்களுக்குள் கொண்டு வரவில்லை என்றால் வரி செலுத்தவேண்டும் என்று இருப்பதை GST யில் ஒரு வருடம் என மாற்றி இருப்பது நல்ல விஷயம். ஆனால் ஒரு வருடத்துக்குள் கொண்டு வராவிட்டால் அது விற்பனை என கருதி அதற்கு வரிவிதிக்கப்படும் என்பது கொஞ்சம் சிக்கல் தான்.

SEZ எனப்படும் சிறப்பு பொருளாதார மண்டலங்களுக்கு விற்கப்படும் பொருட்களுக்கான வரி விதிப்பை போல குழப்பமான விஷயம் பிரிதொன்றும் இல்லை. ZERO RATED என சொல்லப்பட்டாலும், முதலில் வரி செலுத்தி பின்னர் அதை திரும்பபெற வகை செய்து தான் சட்டம் இயற்றப்பட்டு இருக்கிறது. இது SEZ நிர்வாகத்தை நிலைகுலைக்கும். அதிகபட்சமான வரியை செலுத்தவேண்டிய நிர்ப்பந்தமும், (இத்தனைக்கும் SEZ க்கு வரிவிலக்கு இப்போது இருக்கிறது) அப்படி செலுத்திய வரியை திரும்ப பெற விண்ணப்பித்து அது கிடைக்கும் வரையுமான காலத்துக்கு Working Capitalமுடக்கமும் மிகப்பெரிய பாதிப்பை உற்பத்தி துறைக்கு உருவாக்கும்

தினசரி வியாபாரத்தை GSTN இல் பதிவேற்றவேண்டும், ஸ்டாக் விபரங்களைGSTN தளத்தில் தான் கண்காணிக்க வேண்டும் என்கிற விதிமுறைகள் சொல்லி இருந்தாலும், GSTN நமக்கு பார்வையிட அனுமதி இல்லை என்பதும் GSPமட்டுமே அதை செய்யமுடியும் என்பதும் மிக பெரிய சிக்கல். இனி ஒவ்வொரு விஷயத்துக்கும் நாம் GSP க்களை நம்பியே செயல்படவேண்டி இருக்கும். அவர்களுக்கு ஒவ்வொரு பரிவர்த்தனைக்கும் கட்டணம் வேறு செலுத்த வேண்டி இருக்கும்.

GST தரும் மற்றுமொரு சிக்கல், நாம் பெறும் அட்வான்ஸ் தொகைக்கும் வரி செலுத்தவேண்டும் என்பது. அதாவது ஒரு வியாபாரம் ரூ.1,00,000 க்கான ஆர்டர் என வைத்துக்கொள்வோம். 20% அட்வான்ஸ் & பாக்கி விற்பனைக்கு பின் என நிபந்தனைகள் இருந்தால் முதலில் வாங்கும் ரூ.20,000 க்கு வரி செலுத்தவேண்டும். அதற்கு என GSTN கொடுக்கும் தனி Reference Numberஅடிப்படையில் தான் அதற்கான வியாபாரங்களை செய்ய வேண்டும். சொந்த முதலீடு குறைவாகவும் OPM எனப்படும் பிற முதலீடுகளை அதிகமாகவும் வைத்து செய்யப்படும் உற்பத்தி / வியாபார விஷயங்களில் இது மிகப்பெரிய பாதிப்பை ஏற்படுத்தும்.

பல பல விஷயங்கள் இது போல இருந்தாலும் மிக குறிப்பிட்ட விஷயங்களை மட்டுமே இங்கே சொல்லி இருக்கிறேன். மற்றவை பின்னர்.

ஒரு தொழிற்சாலை, பெரும் நிறுவனம், கார்போரேட் என்கிற வகையில் இருந்து பார்த்தால் GST மிக அருமையான விஷயம். ஆனால் சிறு வணிகர்கள்,தரகு நிறுவனங்கள், குறு தொழில் உற்பத்தியாளர்கள் பார்வையில் GST என்பது பெரும் சுமை. நாம் நாட்டு நலன், வரி வருவாய், அரசு சார்ந்த நிறுவனங்களின் லாபம் என்று மட்டும் பார்க்காமல் மக்கள் நலன், சமூக பொருளாதார நிலைமை ஆகியவற்றையும் கருத்தில் கொண்டு சட்டம் கொண்டுவரவேண்டும் என்பதை யாராவது பாஜகவுக்கு புரியவைத்தால் நல்லது 

http://satheeshchennai.blogspot.in/2017/03/gst-4.html